शोध

थकल्यावरती सहज शिराया कूस शोधतो आहे

एकाकी चालुन थकलो, जूलूस शोधतो आहे

गर्दी भाडोत्री मिळते, जयघोष टेप केलेला

सुखसोयींनी युक्त असा मी क्रूस शोधतो आहे

आयुष्याच्या प्रखर उन्हाने रोज काहिली होते

आभासी का होईना, पाऊस शोधतो आहे

प्रेयस, श्रेयस, राजस, तामस - रूप कोणते घ्यावे ?

ज्यात स्वत:ला ओतावे ती मूस शोधतो आहे

मुलगा, भाऊ, नवरा, बाबा, सर्व लेबलांखाली

घुसमटलेला, दडलेला माणूस शोधतो आहे